Duke ndërthurur kryeveprën muzikore të Çajkovskit me ndërhyrje më bashkëkohore, Angjelin Preljocaj risjell një vepër monumentale të repertorit klasik. Ky projekt nisi në vitin 2018 me “Fantazma”, kur Preljocaj i bënte homazh Marius Petipa-së, duke u zhytur në imagjinatën e këtij të fundit pikërisht në momentin kur ai po ideonte “Liqenin e Mjellmave”. Me besnikëri ndaj veprës origjinale, Preljocaj e vendos historinë e mjellmës në kontekstin e sfidave të kohës sonë.
Odeta është një vajzë e re, me ndjeshmëri të lartë ndaj problematikave mjedisore. Ndërkohë, Sigfrid është i biri i drejtuesit të një kompanie që merret me shitjen e pusave të naftës. Një mbrëmje, teksa Odeta shëtit pranë liqenit të mjellmave, përballet me Rothbart-in – një sipërmarrës i korruptuar dhe magjistar i errët. Ai ka zbuluar një burim hidrokarburesh pranë liqenit dhe synon ta shfrytëzojë atë. I konfrontuar nga e reja, e cila mund mund të pengojë planet e tij, ai përdor fuqitë magjike dhe e shndërron atë në një mjellmë…
Gjuha koreografike e pasur dhe plot imagjinatë e Angjelin Preljocajt, gjithmonë e përshkuar nga ëndërrimi dhe sensualiteti, e bën këtë “Liqen Mjellmash” – të interpretuar nga trupa e jashtëzakonshme e kompanisë së tij – një sukses të ri!
